Fact Check: સલમાન અને સની દેઓલ ક્યારેય નથી ગયા બાગેશ્વર ધામ, જૂના વીડિયોને ખોટા દાવા સાથે કરાયા વાયરલ

નવી દિલ્હી (વિશ્વાસ ન્યૂઝ): મધ્યપ્રદેશમાં આવેલા બાગેશ્વર ધામને લઈને સોશિયલ મીડિયા પર અનેક પ્રકારની પોસ્ટ વાયરલ થઈ રહી છે. ક્યારેક કોઈ અભિનેતાની તો ક્યારેક કોઈ નેતાની મુલાકાતની નકલી તસવીરો અને વીડિયોના માધ્યમથી જૂઠ ફેલાવવાનો પ્રયાસ કરવામાં આવે છે. હવે કેટલાક વીડિયોને પોસ્ટ કરીને તેના માધ્યમથી દાવો કરવામાં આવી રહ્યો છે કે બોલિવૂડ અભિનેતા સલમાન ખાન અને સની દેઓલ બાગેશ્વર ધામ પહોંચ્યા. બંનેએ પંડિત ધીરેન્દ્ર શાસ્ત્રીના આશીર્વાદ લીધા.

વિશ્વાસ ન્યૂઝની તપાસમાં સલમાન ખાન અને સની દેઓલની બાગેશ્વર ધામની મુલાકાતનો વાયરલ દાવો ખોટો સાબિત થયો. સલમાન ખાનનો વાયરલ વીડિયો લગભગ ત્રણ વર્ષ જૂનો છે, જ્યારે તેઓ ગણપતિ પૂજનમાં સામેલ થયા હતા. જ્યારે સની દેઓલનો વીડિયો ત્રણ મહિના જૂનો છે, જ્યારે તેઓ પોતાની ફિલ્મના પ્રમોશન માટે બિગ બોસના સેટ પર પહોંચ્યા હતા.

શું થઈ રહ્યું છે વાયરલ?

ફેસબુક યુઝર બાગેશ્વર ધામ સરકારે 11 મે 2023ના રોજ વાયરલ વીડિયોને શેર કર્યો છે. યુઝરે વીડિયોને શેર કરીને કેપ્શનમાં લખ્યું છે, સની દેઓલ પહોંચ્યા બાગેશ્વર ધામ, જાણો શું કહ્યું?

પોસ્ટની આર્કાઇવ લિંકને અહીં જોઈ શકાય છે.

ફેસબુક યુઝર બાગેશ્વર ધામ સરકારે 10 મે 2023ના રોજ સલમાન ખાનના એક વાયરલ વીડિયોને શેર કરતા કેપ્શનમાં લખ્યું છે કે, સલમાન ખાન પહોંચ્યા બાગેશ્વર ધામ, જાણો શું કહ્યું?

પોસ્ટની આર્કાઇવ લિંકને અહીં જોઈ શકાય છે.

તપાસ

વિશ્વાસ ન્યૂઝે સલમાન ખાન અને સની દેઓલના બાગેશ્વર ધામ જવાને લઈને વાયરલ થઈ રહેલા વીડિયોની તપાસ માટે સૌથી પહેલા સંબંધિત કીવર્ડની મદદથી ગૂગલ પર ઓપન સર્ચ કર્યું. અમને એક પણ સમાચાર નથી મળ્યા, જેનાથી એ પુષ્ટિ થઈ શકે કે સલમાન ખાન અને સની દેઓલ ક્યારેય બાગેશ્વર ધામ ગયા હતા.

સલમાન ખાનનો વીડિયો

તપાસને આગળ વધારતા અમે સંબંધિત કીવર્ડ્સ સાથે યુટ્યુબ પર સર્ચ કરવાનું શરૂ કર્યું. આ દરમિયાન અમને સ્નેપ બોલિવૂડ નામની એક યુટ્યુબ ચેનલ પર સલમાન ખાનનો અસલી વીડિયો મળ્યો. આ વીડિયોને 4 સપ્ટેમ્બર 2019ના રોજ શેર કરવામાં આવ્યો છે. આપેલી માહિતી અનુસાર, “આ વીડિયો ગણપતિ મહોત્સવનો છે. વીડિયોમાં સલમાન ખાન બાગેશ્વર બાબાની નહીં પરંતુ ભગવાન ગણેશની આરતી કરતા જોવા મળી રહ્યા છે.”

અમને સલમાન ખાનનો આ વીડિયો આ જાણકારીની સાથે બોલિવૂડ Clapની યુટ્યુબ ચેનલ પર 3 સપ્ટેમ્બર 2019ના રોજ અપલોડ થયેલો મળ્યો.

સની દેઓલનો વીડિયો

સની દેઓલના વીડિયોની સત્યતા જાણવા માટે અમે યુટ્યુબ પર કીવર્ડ્સ દ્વારા સર્ચ કરવાનું શરૂ કર્યું. અમને વીડિયો ગૉસિપ વાલે નામની YouTube ચેનલ પર મળ્યો. આ વીડિયો ત્રણ મહિના પહેલા શેર કરવામાં આવ્યો છે. પ્રાપ્ત માહિતી અનુસાર, “આ વીડિયો બિગ-બોસના સેટનો છે. જ્યારે સની દેઓલ અને અમીષા પટેલ ગદર-2ના પ્રમોશન માટે બિગ બોસના સેટ પર પહોંચ્યા હતા.”

અન્ય વીડિયોને અહીં જોઈ શકાય છે.

https://youtu.be/m9ukg2_sMgw

વધુ માહિતી માટે અમે નઇદુનિયાના છતરપુરના બ્યુરો ચીફ ભરત શર્માનો સંપર્ક કર્યો. તેમણે અમને કહ્યું, “વાયરલ દાવો ખોટો છે. અત્યાર સુધી બંને અભિનેતાઓમાંથી કોઈપણ બાગેશ્વર ધામ નથી આવ્યા. બોલિવૂડના કોઈપણ મોટા એક્ટર બાગેશ્વર ધામ નથી આવ્યા.”

તપાસના અંતે અમે ખોટા દાવા સાથે વીડિયો શેર કરનાર યુઝરનું પેજ સ્કેન કર્યું. અમને જાણવા મળ્યું કે 44 હજાર લોકો યુઝરને ફોલો કરે છે. આ બાગેશ્વર ધામ સરકારના નામે બનાવેલ પેરોડી એકાઉન્ટ છે.

નિષ્કર્ષ: વિશ્વાસ ન્યૂઝની તપાસમાં સલમાન ખાન અને સની દેઓલના બાગેશ્વર ધામની મુલાકાતનો દાવો ખોટો સાબિત થયો. સલમાન ખાનનો વાયરલ વીડિયો ત્રણ વર્ષ જૂનો છે, જ્યારે તેઓ ગણપતિ પૂજનમાં સામેલ થયા હતા. જ્યારે સની દેઓલનો વીડિયો ત્રણ મહિના જૂનો છે જ્યારે તેઓ પોતાની ફિલ્મના પ્રમોશન માટે બિગ બોસના સેટ પર પહોંચ્યા હતા.

ટેગ્ઝ

• Bageshwar dham
• Bageshwar Dham Sarkar
• dhirendra shastri
• Salman khan
• sunny deol