Fact Check : મોંમાં બલ્બ લઈને પ્રદર્શન કરી રહેલી પાકિસ્તાની મહિલાની જૂની તસવીર ભારતના નામે વાયરલ

નવી દિલ્હી (વિશ્વાસ ન્યૂઝ) સમાજવાદી પાર્ટીના સાંસદ હરેન્દ્ર મલિકના ઘરની બહાર પ્રદર્શનના નામે સોશિયલ મીડિયા પર એક તસવીર વાયરલ થઈ રહી છે. આ તસવીરમાં એક મુસ્લિમ મહિલાને મોંમાં બલ્બ લઈને પ્રદર્શન કરતી જોઈ શકાય છે. દાવો કરવામાં આવી રહ્યો છે કે ફ્રી વીજળી માટે આ મહિલાએ મુઝફ્ફરનગરના સાંસદના ઘરની બહાર પ્રદર્શન કર્યું.

વિશ્વાસ ન્યૂઝે વાયરલ પોસ્ટની તપાસ કરી. દાવો ખોટો સાબિત થયો. પાકિસ્તાનની તસવીરને કેટલાક લોકો મુઝફ્ફરનગરના સમાજવાદી પાર્ટીના સાંસદ સાથે જોડીને જુઠ્ઠાણું ફેલાવી રહ્યા છે. વાયરલ તસવીર લાહોરમાં થયેલા એક પ્રદર્શનની છે. આ પ્રદર્શન માર્ચ 2012માં થયું હતું.

શું થઈ રહ્યું છે વાયરલ? 

વાયરલ પોસ્ટના કન્ટેન્ટને અહીં ફેક્ટ ચેકના હેતુથી જેમ છે તેમ જ લખવામાં આવ્યું છે. તેને સાચું માનીને ઘણા યુઝર્સ વાયરલ કરી રહ્યા છે. પોસ્ટનું આર્કાઇવ વર્ઝન અહીં જુઓ.

ફેસબુક યુઝર સત્યમ સોનીએ 12 જૂનના રોજ એક ગ્રુપ પર એક તસવીરને પોસ્ટ કરીને દાવો કર્યો, “મહિલાઓએ મુઝફ્ફરનગરમાં ફ્રી વીજળી માટે સપા સાંસદ હરેન્દ્ર મલિકના ઘરની બહાર મોંમાં બલ્બ લગાવીને કર્યું પ્રતીકાત્મક પ્રદર્શન…”

તપાસ

વિશ્વાસ ન્યૂઝે સપા સાંસદના ઘરની બહાર પ્રદર્શનના નામે વાયરલ તસવીરની તપાસ કરવા માટે સૌથી પહેલા ઓનલાઈન ટૂલનો ઉપયોગ કર્યો. ગૂગલ લેન્સમાં આ તસવીરને અપલોડ કરીને સર્ચ કરતા અમને એસોસિએટ પ્રેસની વેબસાઇટ પર અસલી ફોટો મળ્યો. આ તસવીર પાકિસ્તાનની હોવાનું સાબિત થયું. તેને 31 માર્ચ 2012ના રોજ ક્લિક કરવામાં આવી હતી. તસવીરના કેપ્શનમાં જણાવવામાં આવ્યું છે કે પાકિસ્તાનના લાહોરમાં મુસ્લિમ લીગ-એનની એક મહિલા કાર્યકર્તા મોંમાં બલ્બ લઈને વિરોધ પ્રદર્શનમાં સામેલ થઈ. આ પ્રદર્શન લાહોરમાં પાવર કટના વિરોધમાં કરવામાં આવ્યું હતું. તસવીરને કેએમ ચૌધરીએ ક્લિક કરી હતી.

વિશ્વાસ ન્યૂઝે તપાસના આગળના તબક્કામાં એ જાણવાનો પ્રયાસ કર્યો કે શું ખરેખર મુઝફ્ફરનગરમાં સાંસદના ઘરની બહાર કોઈ પ્રદર્શન થયું છે. અમને ગૂગલ ઓપન સર્ચમાં એવા કોઈ સમાચાર મળ્યા નહીં, જે આ વાતની પુષ્ટિ કરી શકે.

વિશ્વાસ ન્યૂઝે તપાસને આગળ વધારતા મુઝફ્ફરનગરના સપા સાંસદ હરેન્દ્ર મલિક સાથે સંપર્ક કર્યો. તેમણે વિશ્વાસ ન્યૂઝને જણાવ્યું કે તેમના ઘરની બહાર કોઈ પ્રદર્શન ચાલી રહ્યું નથી. વાયરલ તસવીર મુઝફ્ફરનગરની નથી.

હવે વારો હતો ફેક દાવો કરનાર યુઝરની તપાસ કરવાનો. પોતાની પ્રોફાઈલ પર ફેસબુક યુઝર સત્યમ સોનીએ પોતાને એક પત્રકાર જણાવ્યો છે. યુઝર મધ્યપ્રદેશના જબલપુરનો રહેવાસી છે.

निष्कर्ष: વિશ્વાસ ન્યૂઝની તપાસમાં વાયરલ પોસ્ટ ફેક સાબિત થઈ. મુઝફ્ફરનગરના સાંસદના ઘરની બહાર પ્રદર્શનના નામે પાકિસ્તાનની જૂની તસવીરને વાયરલ કરવામાં આવી છે.

ટેગ્ઝ

• Bulb in mouth protest
• Fact Check
• Pakistani woman protesting