Fact Check: અમરોહામાં જુગારમાં પત્નીને હારી જનાર શખ્સના સમુદાયને લઈને ખોટો દાવો વાયરલ

નવી દિલ્હી (વિશ્વાસ ન્યૂઝ) દિવાળીના તહેવાર દરમિયાન અમરોહાની એક પોસ્ટ સોશિયલ મીડિયા પર વાયરલ થઈ રહી છે. દાવો કરવામાં આવી રહ્યો છે કે ઉત્તર પ્રદેશના અમરોહામાં એક પતિએ જુગારમાં હારી ગયા બાદ પોતાની પત્નીને ગીરવે મૂકી દીધી. આ મામલે કુમાર વિરુદ્ધ કેસ નોંધવામાં આવ્યો છે. આ પોસ્ટ શેર કરીને એક સમુદાયને નિશાન બનાવવામાં આવી રહ્યો છે.

વિશ્વાસ ન્યૂઝને તેની તપાસમાં જાણવા મળ્યું છે કે આરોપીની ઓળખને લઈને જે દાવો કરવામાં આવી રહ્યો છે તે ખોટો છે. ખરેખર અમરોહામાં એક મહિલાએ તેના પતિ પર જુગારમાં હારી જતાં પોતાને ગીરવે મૂકી હોવાનો આરોપ લગાવ્યો છે. આરોપી મુસ્લિમ છે. પોલીસે આ મામલે કેસ નોંધ્યો છે.

શું છે વાયરલ પોસ્ટમાં?

ફેસબુક યુઝર ‘Ziya Express’ (આર્કાઇવ લિંક)એ 11 નવેમ્બરે પોસ્ટ કરીને લખ્યું,’સંસ્કારઃ જુગારમાં હારી જતા પતિએ પત્નીને મુકી દીધી ગીરવે, ઉત્તરપ્રદેશના અમરોહાની છે ઘટના, કુમાર સામે ફરિયાદ દાખલ’

‘દીપા સમ્રાટ’ (આર્કાઇવ લિંક) નામના એક્સ યુઝરે પણ આવો જ દાવો પોસ્ટ કર્યો છે.

તપાસ

વાયરલ દાવાની તપાસ કરવા માટે અમે કીવર્ડ્સનો ઉપયોગ કરીને ગૂગલ પર આ વિશે સર્ચ કર્યું. 11 નવેમ્બરે ઝી ન્યૂઝમાં છપાયેલા સમાચારમાં લખવામાં આવ્યું છે કે મામલો યુપીના અમરોહાના ડિડોલી પોલીસ સ્ટેશન વિસ્તારના સિનોરા જલાલાબાદનો છે. ત્યાં એક મહિલાએ ફરિયાદ નોંધાવી છે કે તેનો પતિ તેને જુગારમાં હારી ગયો છે. મહિલાએ તેના સાસરિયાઓ પર દહેજ માટે ઉત્પીડનનો આરોપ પણ લગાવ્યો છે. તેણીના નિકાહ ત્રણ વર્ષ પહેલા આરોપી સાથે થયા હતા. સમાચાર અનુસાર, પોલીસને આપેલી ફરિયાદમાં પીડિતાએ કહ્યું છે કે, તેનો પતિ જુગારી છે. તે તેની પાસે જુગાર રમવા માટે લાખો રૂપિયા માંગે છે. છ મહિના પહેલા પતિ અને સાસરિયાઓએ માર મારીને ઘરની બહાર કાઢી મૂકી હતી. પતિએ તેને દિલ્હીમાં રાખી હતી. ત્યાં આરોપી તેને જુગારમાં હારી ગયો હતો. પીડિતાનો ભાઈ તેને ત્યાંથી લઈ ગયો. સમાચાર મુજબ આરોપી મુસ્લિમ છે.

આ મામલે અમરોહા પોલીસના એક્સ હેન્ડલ પરથી એક્સ યુઝર દીપા સમ્રાટની પોસ્ટ પર જવાબ આપતા લખવામાં આવ્યું છે કે મહિલાની ફરિયાદ પર તેના પતિ અને સાસરિયાઓ સામે દહેજ ઉત્પીડન અને અન્ય કલમ હેઠળ કેસ નોંધવામાં આવ્યો છે. તેમાં પણ આરોપીને મુસ્લિમ સમુદાયનો જણાવવામાં આવ્યો છે. 

અમે આ વિશે અમરોહામાં દૈનિક જાગરણના ક્રાઈમ રિપોર્ટર આતિફ અલી સાથે વાત કરી. તેઓનું કહેવું છે કે, “પોલીસે પીડિતાના પતિ સહિત નવ લોકો સામે કેસ નોંધ્યો છે. આરોપી મુસ્લિમ સમુદાયનો છે.” તેઓએ અમને એફઆઈઆરની એક કોપી પણ મોકલી, જેમાં લખ્યું છે કે મહિલાના નિકાહ ત્રણ વર્ષ પહેલા આરોપી સાથે મુસ્લિમ રિવાજ મુજબ થયા હતા.

છેલ્લે અમે ભ્રામક પોસ્ટ કરનારા ફેસબુક યુઝરની પ્રોફાઈલને સ્કેન કરી. 23 જાન્યુઆરી, 2021ના રોજ બનેલા આ પેજના લગભગ 19 હજાર ફોલોઅર્સ છે.