નવી દિલ્હી (વિશ્વાસ ન્યૂઝ): ઉત્તર ભારતીય રાજ્યોમાં વરસાદનો કહેર યથાવત છે. ઘણા રાજ્યોમાં વરસાદને કારણે ઘરોને નુકસાન પહોંચ્યું છે અને ઘણી જગ્યાએ ભારે વરસાદને કારણે જાનમાલનું નુકસાન થયું છે. આ વચ્ચે સોશિયલ મીડિયા પ્લેટફોર્મ પર ઘણા ખોટા અને ભ્રામક સમાચારો ફેલાવવામાં આવી રહ્યા છે. હવે આ કડીમાં મુંબઈના નાલાસોપારા રેલવે સ્ટેશનનો એક વીડિયો શેર કરવામાં આવી રહ્યો છે. જેમાં રેલવે ટ્રેક પર પાણી ભરેલું જોઈ શકાય છે. યુઝર્સ આ વીડિયોને તાજેતરનો જણાવીને શેર કરી રહ્યા છે.
વિશ્વાસ ન્યૂઝને તેની તપાસમાં જાણવા મળ્યું કે વાયરલ વીડિયો વર્ષ 2017નો છે. વીડિયોને તાજેતરના વરસાદની સાથે કોઈ લેવાદેવા નથી.
ફેસબુક યુઝર ‘ઘર ઘર મોદી’ (આર્કાઈવ લિંક)એ 11 જુલાઈના રોજ વીડિયો શેર કરતા લખ્યું, “ભારે વરસાદને કારણે નાલાસોપારા રેલવે સ્ટેશન એક અજાણ્યા વોટર પાર્કમાં ફેરવાઈ ગયું છે, જેના કારણે લોકો મજાકમાં તેની સરખામણીમાં ઈમેજિકા વોટર પાર્ક સાથે કરી રહ્યા છે.” #NalaSoparaRailwayStation #Mumbai #Rainfall #MumbaiRains #viralvideo
વિશ્વાસ ન્યૂઝે વાયરલ વીડિયોની તપાસ માટે સંબંધિત કીવર્ડ્સથી Google પર સર્ચ કર્યું. અમને વાયરલ વીડિયો સંબંધિત ન્યૂઝ રિપોર્ટ NDTV ઈન્ડિયાની વેરિફાઈડ યુટ્યુબ ચેનલ પર અપલોડ મળ્યો. 21 સપ્ટેમ્બર 2017ના રોજ અપલોડ કરાયેલા વીડિયોમાં વાયરલ વીડિયોને જોઈ શકાય છે. આપવામાં આવતી માહિતી મુજબ, “આ વીડિયો મુંબઈના નાલાસોપારા રેલવે સ્ટેશનનો છે. વરસાદ બાદ રેલવે ટ્રેક પર પાણી ભરાઈ ગયું હતું. તે દરમિયાન આ વીડિયોને શૂટ કરવામાં આવ્યો હતો.”
વાયરલ વીડિયો સાથે સંબંધિત ન્યૂઝ રિપોર્ટને એબીપી લાઈવની વેરિફાઈડ યુટ્યુબ ચેનલ પર પણ જોઈ શકાય છે. 20 સપ્ટેમ્બર 2017ના રોજ અપલોડ વીડિયોમાં જણાવવામાં આવ્યું હતું કે, “મુંબઈઃ થાણેના નાલાસોપારા સ્ટેશન પર પાણીથી ભરાયેલા રેલવે ટ્રેક પર બુલેટ ટ્રેનની ઝડપે દોડી ટ્રેન.”
સર્ચ દરમિયાન અમને હિન્દુસ્તાન ટાઈમ્સ પર વાયરલ વીડિયો સંબંધિત સમાચાર મળ્યા, જેને 21 સપ્ટેમ્બર 2017ના રોજ પ્રકાશિત કરવામાં આવ્યા હતા. સમાચારમાં વીડિયોના સ્ક્રીનશોટનો ઉપયોગ કરવામાં આવ્યો હતો. રિપોર્ટ મુજબ, “આ ઘટના ત્યારે બની, જ્યારે વિરાર સ્ટેશન માસ્ટર ડ્રાઈવરને એ જણાવવાનું ભૂલી ગયા કે ભારે વરસાદને કારણે તમામ ટ્રેનોને 8 કિમી પ્રતિ કલાકની ઝડપે દોડવાની ચેતવણી આપવામાં આવી હતી. પશ્ચિમ રેલવેના વિરાર સ્ટેશન માસ્ટર અને એક્સપ્રેસ લોકો પાયલોટને સસ્પેન્ડ કરવામાં આવ્યા છે. આ ઘટનાની તપાસ માટે 3 સભ્યોની કમિટીની રચના પણ કરવામાં આવી છે. જ્યારે સ્ટેશન માસ્ટર ટ્રેક પર પાણી ભરાઈ જવા અંગે ડ્રાઈવરને જાણ કરવાનું ભૂલી ગયા, ત્યારે લોકો પાયલોટે પ્લેટફોર્મ પરના મુસાફરો પર પાણી ઉડાડતા પૂરપાટ ઝડપે ટ્રેન દોડાવી હતી. નાલાસોપારા સ્ટેશન પર રાહ જોઈ રહેલા એક મુસાફર દ્વારા શૂટ કરાયેલ આ ઘટનાનો વીડિયો સોશિયલ મીડિયા પર વાયરલ થયો છે.”
આ મામલે પુષ્ટિ કરવા માટે અમે મિડ-ડેના સિનિયર રિપોર્ટર સમીઉલ્લાહ ખાન સાથે સંપર્ક કર્યો. તેઓએ અમને કહ્યું, વીડિયો જૂનો છે. આ વીડિયો સોશિયલ મીડિયા પર ખૂબ જ વાયરલ કરવામાં આવ્યો હતો. તેને તાજેતરના વરસાદ સાથે કોઈ સંબંધ નથી.
તપાસના અંતે અમે જૂના વીડિયોને તાજેતરનો ગણાવીને શેર કરનાર ફેસબુક યુઝર ‘ઘર ઘર મોદી’ના એકાઉન્ટને સ્કેન કર્યું. સ્કેનિંગથી અમને જાણવા મળ્યું કે યુઝર મધ્યપ્રદેશના ભોપાલનો રહેવાસી છે.
નિષ્કર્ષ: પાણીથી ભરાયેલા રેલવે ટ્રેક પર ફૂલ સ્પીડમાં દોડતી ટ્રેનનો વાયરલ વીડિયો મુંબઈના નાલાસોપારા રેલવે સ્ટેશનનો વર્ષ 2017નો છે. તાજેતરના વરસાદ સાથે તેને કોઈ લેવાદેવા નથી.
Knowing the truth is your right. If you have a doubt on any news that could impact you, society or the nation, let us know. You can share your doubts and send you news for fact verification on our mail ID contact@vishvasnews.com or whatsapp us on 9205270923